Esperanto Midi-Pyrénées
menu occitan menu esperanto
Vous êtes ici >> Accueil/La Krokodil', le blog du Centre Culturel Espéranto/Renkontiĝo kun asociano: Nicolas
logo Krokodil

Renkontiĝo kun asociano: Nicolas

17/12/2012 - Lu 996 fois
En ĉi tiu tria epizodo de la serio "Renkontiĝo kun asociano", parolas pri si unu el la plej junaj aktivuloj de EKC. Li gvidas kuiratelieron tiel lerte kiel esperanto-kursojn… Ni renkontiĝu kun Nicolas!

Saluton! Bonvolu prezenti vin al la legantoj de la Krokodil'.

Saluton, mi provas esti mi: Nicolas Gaufillet se vi legas la francan, Nikola Gofije se vi legas la esperantan, Niko se ni antaŭe amikiĝis (por tio sufiĉas inviti min al la trinkejo) aŭ se vi forgesis tion, kion mi antaŭe skribis, kaj Majstro se vi vere opinias ke mi meritas tion. Se via cerbo konsistas el granda misordaĵo kaj konfuzaĵo elektu vi mem nomon por mi. Por pliaj detaloj, aŭ por ricevi mian fotaĵon, skribu al mi.

Kiel kaj kiam vi eksciis pri Esperanto?

Mi vizitadis bazan lernejon kiam mia instruisto petis al mi prezenti al miaj samklasanoj la internaciajn lingvaĵojn (t.e. muziko, esperanto, ciferoj...). Unu jaron poste, mia patro amikiĝis − pro tute aliaj kialoj − kun viro kiu fakte prezidis la lokan Esperantan klubon, mi do endome plurfoje renkontis lin nepovanta ne paroli pri sia hobio! Mi tiam 8-jaraĝas eble.

Ĉu vi eklernis jam tiam?

Ne, mi eklernis esperanton eble 15 jarojn poste!

Kial vi decidis eklerni?

Unue mia celo estis malkovri la lingvon, mi decidis ĉeesti ĉiam la semajnan kurson kaj labori serioze hejme dum 6 monatoj por poste decidi ĉu mi daŭrigos mian lernadon. Mi daŭrigis ĉar mi malkovris multe pli ol "nur lingvon", ĉar mi partoprenis la kongreson de Bulonjo-ĉe-Maro en 2005 kiu travivigis al mi tre interesan internacian sperton.

Ĉu vi instruas ĝin de longa tempo?

De 2008 mi kredas, kiam mi prepariĝis al la kapableco [n.r.: la "kapableco" estas atesto pri kapablo instrui Esperanton, aljuĝita de Franca Esperanto-Instituto]. Iom antaŭe mi komencis korekti lecionojn per Ikurso.

Kiajn kontaktojn vi havas kun tiuj homoj, kies lecionojn vi korektas? Ĉu vi amikiĝis kun iuj el ili?

Dependas de la homoj: kelkaj jam sendis donacojn al mi, kun iu mi amikiĝis, aliaj jam venis manĝi hejmen, aliaj invitis min al restoracio… Sed plej ofte la rilato estas afabla sed nur perreta. Foje estas tute neŭtrala kaj senvarma rilato. Sed ĉiel estas utila kontakto!

Esperantistoj kutimas diri, ke ilia lingvo facilas. Mi memoras vin diranta, iam dum staĝo, ke vi opinias Esperanton malfacila lingvo. Ĉu vi povas klarigi tion?

Esperantistoj kutimas diri stultaĵojn, kaj mi kutime esperantistas. Esperanto estas facila, kion tio signifas? Facila por kiu? Facila rilate al kio? Esperanto estas konstruita (kaj ni daŭrigu tiun celon) por esti kiel eble plej facile lernebla por homoj. Vasta plano. Sed vivanta, evoluanta lingvo, uzata internacie de miloj da homoj nepre entenas malfacilaĵojn. Ĉu ni preferus (ĉu eblas) "robotan lingvon"? Mi diras: bazan (mezan) nivelon en Esperanto vi facile akiros, sed ne dormante.

Vi estas patro de etulino, kiu nomiĝas Amalia, al kiu vi parolas nur Esperante de ŝia naskiĝo. Kio motivis vian decidon?

Mia motivo ne vere rilatas al Esperanto, sed al la fakto ke ŝi povas denaske fariĝi dulingvanino. Do, laŭ mi ŝia spirito estas pli malferma, ĉar mi proponas al ŝi alireblon al alia mondo, alia kulturo, temas pri ŝanco kiun mi donacas al mia idino. Se mi parolus la bretonan, la rusan, mi samagus, sed mi parolas Esperanton.

Kiajn problemojn oni frontas, dum oni uzadas Esperanton kiel ĉiutagan lingvon en la hejmo?

Vi havu vastan vortprovizon, tre ofte ne literaturan. Kiam oni lernas Esperanton, oni lernas valorajn, belajn frazojn, verbojn, adjektivojn sed ne la nomojn de la dinosaŭroj aŭ de la maŝinoj kiujn uzas la terkulturisto.... Eble tiajn vortojn vi taksas fakaj, sed en franclingvaj infanlibroj kiuj nomiĝas "la farmbieno" aŭ "la misteraj bestoj" vi trovos multe da ili! Fakte, infanlibron kunportu por instrui Esperanton…

Dankon Nicolas, kaj ĝis baldaŭ!


Legu ankaŭ la pasintajn intervjuojn de ĉi tiu artikol-serio:
⇒  Alain, kuracisto kaj astronomi-amatoro
⇒  Christine, radio- kaj teatro-ŝatanto

Membres : Christophe Chazarein infos sur le membre | contactez le membre
Partager cet article wikio : Partager cet article | digg : Partager cet article | del.icio.us : Partager cet article | facebook : Partager cet article | scoopeo : Partager cet article | blogmarks : Partager cet article | additious : Partager cet article |
Partager les derniers articles Netvibes : Partager les derniers articles | iGoogle : Partager les derniers articles | My Yahoo : Partager les derniers articles | wikio : Partager les derniers articles | RSS : Partager les derniers articles |